Maríuerluparið hamaðist við hreiðurgerð. Þóttumst við þekkja ættarsvipinn á þeim, að hér væru ömmubörn fyrsta parsins sem bjó undir þakskeggi kofans eitt sumarið. Og brostum í kampinn. Héldum svo heimleiðis í dag. Hina leiðina.
Við tilraunabúið á Hesti var hópi lambáa sleppt í lítið beitarhólf. Lömbin sugu þrýstin júgur mæðra sinna. Fjárhirðir var skammt undan með rúllubagga framan á dráttarvél. Hann stefndi til þeirra. Smellið á myndirnar.
![Lambær Mæðra og lamba vernd](http://www.oliagustar.is/wp-content/uploads/2009/05/lambc3a6r-1-300x94.jpg)
Litlu síðar stansaði verkstjóri vegaviðgerða hjá Borgarverki og heilsaði glaðhlakkalega. Rögnvaldur Óli Jónsson. Barnabarn. Eftir stutt samtal og fréttir af vel heppnuðum kórsöng, kvöddust þau af ástríðu, amman og Rögginn.
![Rögnvaldur Óli Barnabarnið og afinn í sólglerinu](http://www.oliagustar.is/wp-content/uploads/2009/05/rognvaldur-og-afinn-271x300.jpg)
![Rögginn og amman Innileg kveðjustund](http://www.oliagustar.is/wp-content/uploads/2009/05/rognvaldur-og-amman-300x201.jpg)
Á hinni leiðinni voru álftir í hópum. Þeim leist ekki vel á að bíllinn hægði ferðina. Ásta greip í stýrið og mynd var tekin út um glugga.
![Álftir á túni Álftirnar og hin leiðin](http://www.oliagustar.is/wp-content/uploads/2009/05/alftir-1-300x168.jpg)
Ferjukot og næsta umhverfi er staður milljón minninga. Laxveiði í net. Faxaborg. Íþróttamót. Hestamannamót. Hlaup, stökk og kappreiðar.
Og öll þessi dulitlu drög sem slíkum mannamótum fylgja.
![Ferjukot Ferjukot í ramma](http://www.oliagustar.is/wp-content/uploads/2009/05/ferjukot-1-300x204.jpg)
Þá eru sögur af veginum yfir Ferjukotssíkin margfrægar. Ár eftir ár seig hann og sökk og ár eftir ár varð að bæta í hann efni til að halda honum upp úr vatni. Nú var þarna friðsælt. Hópur fáka á beit. Við ákváðum að taka þá með og leyfa fleirum að sjá þessi Íslands göfugustu dýr, háma stör á vatnsbakka.
![Fákar á beit Hestarnir við síkið](http://www.oliagustar.is/wp-content/uploads/2009/05/hestar-1-300x164.jpg)
Umvefjandi landslag Borgarfjarðar lumar á glettnum yfirlýsingum sem sumar hverjar minna gamla menn á að vafasamt sé að taka sumarmyndir löngu áður en sumarið er komið.
![Crazy Án titils](http://www.oliagustar.is/wp-content/uploads/2009/05/crazy-300x185.jpg)
Flottar myndir, kær kveðja.