Í dag – og græna myndin

Í dag fer ég til baka í huganum. Fyrst um átta ár. Þá gengum við Ásta í æskuspor okkar sjálfra. Í ágústbyrjun. Gróðurinn á hátindi blómans. Það var mikið regn. Vatnið sat í haugum á gróðrinum. Slóð kom eftir fætur okkar. Í einni bóka Halldórs Laxness segir að grasið væri svo grænt að sýndist vera blátt. Þetta var þannig dagur.

Myndin hér fyrir neðan er tekin í Skógarhrauni í landi Gilsbakka í Hvítársíðu. Nánar tiltekið við Litla Fljót skammt frá Stínuflöt og Strípstjörnum. Ásta er með bakpoka. Í honum er nesti. Sjálfur bar ég myndavél í mínum bakpoka. Regnið rann niður í hálsmálið og eyðilagði farsímann minn.

Græna myndin og regnið
Græna myndin og regnið

Smellið á myndina og sjáið stærri gerð hennar. Ef vel tekst til sést heim til Gilsbakka efst á myndinni. Sjá má að túnslætti er lokið. Kolstaðahnúkur er lengst til hægri efst.

Fjörutíu árum áður höfðum við gengið um þessar slóðir. Sumarstelpa og sumarstrákur í sveit. Endurminningin vekur margslungnar tilfinningar. Fiðring. Við vorum á byrjunarreit. Þegar frú Ásta kemur heim úr vinnu síðdegis í dag er hún jafnframt komin í frí fram yfir páska. Hún átti inni sumarleyfisdaga frá síðasta ári. Og við stefnum upp í Borgarfjörð um helgina. Í kofann okkar á bökkum Hvítár. Litlatré.

Ég velti mér upp úr þessu í dag horfandi á regnið á grænu myndinni.

2 svör við “Í dag – og græna myndin”

  1. Segi nú bara, sömuleiðis kæri Arnbjörn. Bestu óskir til þín og þíns fólks. Væntanlega verður margt af því í kringnum þig um páskana. Innilegar kveðjur frá okkur Ástu.
    Gleðilega páska.

Skildu eftir svar

Netfang þitt verður ekki birt.

This site uses Akismet to reduce spam. Learn how your comment data is processed.