Blóðakurinn

Við vorum í sveitinni í gær. Það var fremur kuldalegt. Hafði snjóað um nóttina og því hvít þekja yfir landinu þegar við komum á fætur. En það var heiðskírt og logn og sólin, alltaf jafn vinsamleg, gerði gott úr öllu. Þá var kyrrðin í sveitinni alger og fátt sem hreyfðist utan gufumökkur sem steig upp af hverum í nágrenninu. Þar til lítil einkaflugvél rauf kyrrðina. Cessna Skyhawk.

Hún flaug lágflug yfir býlin fram með Síðufjallinu. Stór flokkur gæsa truflaðist á bökkum Hvítár og flaug upp. Vafalaust um hundrað gæsir, með tilheyrandi gargi. Þær fóru eins og ský um loftið, flugu allstóran hring og lentu síðan á akri í grenndinni. Við finnum til með þeim á þessum árstíma. Menn skemmta sér við að drepa þær. Heyrði af sælkeraveislu þar sem aðeins var boðið upp á marineruð gæsahjörtu.

Þá mátti lesa í blöðum fyrir skömmu að bændur leigðu akra sína gæsaveiðimönnum. Fyrir peninga að sjálfsögðu. Í fyrrahaust vorum við Ásta vitni að aðgerðum veiðimanna. Þeir komu um kvöld og dreifðu gervigæsum á einum akrinum. Mikil ljósadýrð bílljósa og ljóskastara fylgdi þessu og stóð undirbúningurinn yfir fram undir miðnætti. Við aftureldingu næsta dag kom gæsaflokkur fljúgandi yfir svæðið, flaug fyrst í hring, lækkaði síðan flugið og settist loks hjá gervigæsunum.

Plamm. Plamm, heyrðist af svæðinu. Skotmennirnir höfðu legið í felulitum í grennd. Gæsahópurinn flaug upp. Eitt gæsaparið var svolítið seinna fyrir. Þær flugu tvær saman í vesturátt. Plamm. Plamm. Önnur gæsin féll til jarðar. Hin snéri við á fluginu til að aðgæta hvað hefði komið fyrir félaga sinn. Flaug hring. Hikandi. Lækkaði flugið eins og í spurn. Plamm. Plamm. Hún féll einnig til jarðar. Við köllum skikann Blóðakurinn.

Skildu eftir svar

Netfang þitt verður ekki birt.

This site uses Akismet to reduce spam. Learn how your comment data is processed.