Á pósthúsinu

-Sæll og blessaður, kallaði pakkaafgreiðslumaðurinn yfir öxlina á stúlkunni sem afgreiddi mig. Hún fyllti út skýrslu um innihald pakkans sem ég var að pósta til systur minnar í Texas. Ég var einmitt að hrósa stúlkunni fyrir fallega rithönd.

Ég heilsaði manninum. Fannst hann samt trufla mig. En hann var glaðhlakkalegur. -Langt síðan við höfum sést,- hélt hann áfram. Nú var ég að reyna að segja stúlkunni hvað innihald pakkans var. – Xmas gifts, Home made candy. Bush setti reglur um það eftir Tvíburaturnana. Pakkamaðurinn lét sig ekki.

Nú töluðu þau við mig bæði í einu. Það er óþægilegt. Ég snéri mér að manninum. –Þú ert enn með alskegg,- sagði ég. –Já, Það vex nú bara þarna, sagði hann og bætti við – Hafið þið það gott hjónin? -Mjög gott, svaraði ég. –Og frúin líka? bætti hann við í spurnartón. –Ég hef það betra en hún, svaraði ég. Hann leit framan í mig og sagði, -Nú? –Já. Ég bý með henni.

Póstkostnaðurinn var svipað hár og verðmæti innihalds pakkans.

Skildu eftir svar

Netfang þitt verður ekki birt.

This site uses Akismet to reduce spam. Learn how your comment data is processed.